Breve currículum vitae

Inés Sánchez Sellero (Ferrol, 1966) é Profesora Titular da Área de Toxicoloxía da Universidade de Santiago de Compostela, cunha ampla traxectoria docente, investigadora e de xestión universitaria no ámbito das ciencias da saúde e das ciencias forenses. Licenciada en Medicina e Cirurxía pola USC, doutorouse en 1995 coa obtención do Premio Extraordinario de Doutoramento.

Foi bolseira de Formación de Persoal Investigador (FPI) e realizou estadías posdoutorais no Departamento de Neuroquímica da Universidade de Alicante e no Servizo de Toxicoloxía Industrial da Universidade de Padua (Italia), reforzando a súa especialización en toxicoloxía experimental e aplicada. É médico inspector do SERGAS en situación de excedencia e conta cun Diploma en Docencia Universitaria desde 2006.

Desde 1999 é Profesora Titular de Universidade na USC, con catro sexenios de investigación recoñecidos. Participou como investigadora en quince proxectos competitivos e foi membro do Comité científico do Instituto de Farmacia Industrial da USC. Actualmente é secretaria do Instituto de Ciencias Forenses da USC (INCIFOR).Ao longo da súa traxectoria asumiu diversas responsabilidades académicas, entre elas a coordinación da Área de Toxicoloxía e a secretaría do Programa de Doutoramento Avances e Novas Estratexias en Ciencias Forenses. No ámbito docente impartiu docencia durante máis de vinte anos na Facultade de Veterinaria e na Facultade de Ciencias do Campus de Lugo. Desde 2020 desenvolve a súa actividade docente no Campus de Santiago de Compostela, impartindo docencia en titulacións de Medicina, Farmacia, Dereito, Enxeñaría e na ETSE, así como no Máster Universitario en Investigación Química e Química Industrial.